Friday, June 28, 2013

社會記錄協會 SocREC

他們非為呃Like上前線 
為彌補傳媒不足

蘋果日報 2013年6月28日

在fb送飯、微博撈麵的日子,傳統媒體已經不能再主導大氣候。人人都是記者的年代,梁日明與Benson Tsang走得最前。每逢7.1大遊行,他們總會孭着相機、Hand Cam、腳架一大堆架生,即時追擊,即時分享。不管你Like與不Like,他們就是要把你帶到抗爭最前線。他們非為了呃Like,全憑一顆與強權周旋的鬥心。
記者:蔡元貴

留意社運的網民,應知道SocREC這名字。創立於2010年的社會記錄協會,是由幾名熱愛拍攝、音響、IT的朋友組成,沒有一人是全職,個個都要為口奔馳,利用所餘無多的公餘時間參與SocREC活動。創辦人梁日明任職空運業,通宵上班,遇上遊行示威,他就犧牲休息時間,帶備拍攝器材跟大隊,現場直播遊行活動,並保存檔案以便網民在以後有需要時重溫。

「我哋核心成員9至11人左右,但全部都係業餘興趣,冇職員,所以唔會腐化、官僚,將來散檔就拍手無塵。」他們要自掏腰包,撐起SocREC。除了每月支付工廠大廈單位租金1,700元,儲存裝備器材,還要自資數十萬元的攝影器材,唯一收入就是街頭及網上捐款。這樣操勞又傷財,為了甚麼?

「我一向對拍嘢有興趣,幾年前開始,已經有好多人喺遊行期間拍片,問題係冇系統咁做紀錄,資料好易遺失。某啲短片上載之後會好hit,但係隔一排就會沉底,等於白做。而且呢啲短片,係由唔同人各自拍攝擺上網,冇系統,好亂,散修修,後來有人想睇番,未必search到。所以SocREC就自己出動攝錄,做直播,然後將啲片段整合埋一齊,等人可以按圖索驥。」

無剪輯片捧紅黃之鋒

他們不滿足於主流傳媒對遊行示威的報道手法,認為SocREC可彌補不足:「一般傳媒報道遊行示威篇幅有限,而且會通過剪裁加入主觀角度。我哋唔去做編輯。幾百萬hit rate唔係我哋方向,我哋啲嘢好長、好悶,因為我哋唔會揀嘢畀人睇;但係我哋冇特效、冇旁白、冇意見,可信度高。以後無論傳媒行家、大學師生,有需要重溫足本遊行片段,都有個資料庫。」

說得如此高層次,到底SocREC威力有多大?「其實黃之鋒咁紅,都係全靠我哋拍條片。反洗腦教育初期,學民思潮喺政總請願,記者同黃之鋒做訪問,講咗好耐,但係出到街得番一兩句。我哋就將條片完整咁上載出來,網民見到黃之鋒講嘢好有條理,條片越傳越勁,小明星就係咁樣產生。」梁日明說着,難掩一臉自豪。

紀錄多次7.1遊行,梁日明印象最深,反而是一次遊行完結後的事。2010年7.1遊行大隊和平散去後,一群以80後年輕人為主的示威者留守政總,抗爭至深夜時分,港大學生陳巧文突然與男友爬上大樹,以防被警方抬走清場。二人在樹上逗留了數小時,至翌日清晨五時許才被消防員利用雲梯驅回地面。SocREC成員其間也在現場通宵見證,梁日明形容這是他在歷次7.1中見過最「過癮」一幕。

警權膨脹抹黑示威者

梁日明還在遊行演變中察覺到,警權不斷膨脹。「自從曾偉雄上台之後,對示威遊行管制得好嚴,唔理乜嘢人,拉晒先。警方對我哋呢啲民間記者好唔友善,覺得我哋係敵人,因為我哋影到佢哋嘅醜態。」2011年3月,一名男警向一名示威少女的胸口喪打三拳,就是靠SocREC現場紀錄揭發出來,警方無從抵賴。

另一變化是,警方越來越多招數抹黑示威者。譬如刻意收窄遊行範圍、拖延遊行隊伍進度,使示威者鼓譟,繼而產生衝突。梁日明認為這是警方給示威者製造的陷阱,令不在場的公眾覺得遊行人士過激。

即使警察打壓,SocREC仍會堅持做好紀錄者的角色:「好多人流咗一身汗,新聞唔會一一報道,我哋幫佢做紀錄,個心願就係咁簡單。呢個功能好重要,屬於香港歷史一部份。一個社會運動,一定有重要訊息,如果呢啲訊息隨住時間流逝而消失,就係白做。」

No comments: