Sunday, February 19, 2012

「平等分享行動」

四日三次掃蕩 「當我哋唔係人」
露宿者轟執法者搶財物

2012年02月19日

【本報訊】朱門酒肉臭,路有凍死骨,特首參選人唐英年僭建「地下皇宮」,屋宇署只籲盡快清拆,露宿者瑟縮天橋底,食環署竟四日內三次清場,毛氈、衣物下落不明,面對冷鋒,身寒心更寒。活在香港的弱勢社群,只能慨嘆一句,生容易,活容易,生活卻不容易。 記者:袁慧妍

深水埗玉石市場外一向有近 40名無家者露宿街頭,早前深水埗民政事務處、食環署及警方聯手清場,床褥被鋪全被沒收棄掉,部份露宿者更不知所終。

社區組織協會幹事吳衞東表示,以往當局清場前均事先貼出告示通知露宿者,但上周日、周一及周三早上 9時許,十多名警察及食環署人員突然到場掃蕩,甚至禁止露宿者執拾私人物件,慈善機構送出的禦寒衣物、床鋪,通通「冇得留低」,露宿者只能眼睜睜看着執法人員無理「強奪」私人物品,有部份露宿者更失去銀包、提款卡,甚至與海外家屬的聯絡電話,欲哭無淚。吳衞東質疑有區議員向民政處投訴,圖趕絕露宿者。

右腳截肢的露宿者張先生表示,因行動不便未能及時奪回財物,「警察態度好差,唔俾我執,冇理過我感受」;李伯更說政府只幫有錢人,欲趕絕露宿者,「好憎恨呢個政府,當我哋唔係人」。

領綜援義工煲粥送暖

中年義工蓮姐得知露宿者慘況,決定把自己的綜援金奉上,近日每天為他們送上禦寒衣物,又送上熱騰騰的蠔豉粥,在寒冬中雪中送炭,蓮姐謂:「露宿者好慘,你估佢哋想瞓街咩?天氣咁凍,政府係咪想佢哋死?政府唔幫咪我幫囉,最多我自己慳啲使!」

關注露宿者團體「平等分享行動」召集人 Benson,昨晚與義工到深水埗為露宿者送上衣物,並譴責政府以鐵腕手段打壓露宿者,「無家者都係人嚟㗎,政府可唔可以有番啲人性?」

深水埗民政事務處表示,該處定期與其他部門進行跨部門聯合行動,以保持區內環境 衞生,上周該處只在周三進行了一次聯合行動。

No comments: