Wednesday, March 02, 2011

香港發明協會

發明協會主席批財案不救急
【明報專訊】財政預算案公布後,民怨四起,連創意產業代表也要「發聲」。Emily噚日去香港發明協會國際發明比賽香港頒獎禮,年屆94協會主席張景豐盡訴對預算案不滿,佢話幾個月前預算案賣電視廣告諮詢,佢去信財爺曾俊華發表意見,叫財爺從庫房拎錢出,將香港發展成為知識型社會,到上星期至收到回覆話會研究。

去信表意見 上周獲覆「會研究」

不過,預算案公布令張主席大失所望,佢話當局政策「唔係幾好」,庫房水浸都唔拎錢幫基層市民、社團、中小企解決燃眉之急,無回應社會需求。

佢話,為香港未來社會發展,財爺應該「顧前又顧後」,就好似播種咁,踏出第一步,先會有回報,否則「時間唔等人」。

斥專利資助限制多

政府話致力發展創意產業,但張主席就批評,發明家向創新科技署申請最多15萬元專利資助,「一世人得一次」,資源限制多多。佢建議政府畀多資源,即使每年有700件發明,都起碼可以有進展,創造就業機會,唔再係「齋講」。

No comments: